Afûk-winkel wer ûnderdiel fan Stap op de Rode Loper
Hoe krijst 900 vmbo-learlingen op in kâlde novimbermoarn safier dat se yn ûnder oaren it Fries Museum, Tresoar, Tryater, de Harmonie, Afûk of dbieb ferbjustere nei skriuwers, ferhalefertellers en oare taalkeunstners harkje? Stap op de Rode Loper! slagget dêryn. Op moandei 25 novimber is it taal- en lêsbefoarderingsevenemint foar de sechde kear yn Ljouwert.
Dat de lêsfeardigens fan skoalgeande jongeren ysbaarlik leech is, witte wy yntusken allegear, mei tank oan it PISA-ûndersyk ûnder 15-jierrigen: leafst ien op de fjouwer learlingen rint it risiko op letterswakte. De ûnderwiisynspeksje konkludearret ek dat de lêsfeardigens ûnder jongeren, benammen ûnder vmbo’ers, hieltyd minder wurdt.
Dochs merke de organisatoaren dat in evenemint as Stap op de Rode Loper! in protte dwaan kin oan de lêsmotivaasje fan jongeren. By Stap op de Rode Loper! helje skriuwers, rappers, ferhalefertellers, striptekeners, teätermakkers en oare taalkeunstners alles út de kast om de learlingen sjen te litten wat taal is, wat je dermei dwaan kinne én hoe moai oft taal en lêzen wêze kinne.
Vmbo’ers meie op op moandei 25 novimber by de ferskate ynstellingen dichtsje en rappe, besjogge in bysûndere teäterfoarstelling en geane yn petear mei populêre skriuwers. Se leare by de ynspirearjende workshops de kulturele ynstellingen kennen en dêrmei in foar harren faak ûnbekende kulturele wrâld.
Inisjatyfnimmer Peggy Alderse Baas: “Ze hebben ook gewoon heel veel plezier. Na zo’n dag zijn ze meer geïnteresseerd in boeken en lezen. We horen van docenten Nederlands dat de boeken van de schrijvers die de leerlingen bezoeken, nog lange tijd populair blijven.”
Lokaasjes
By de Afûk yn de winkel komt auteur Maren Stoffels fjouwer kear in workshop jaan oer har fak en har boek No Exit.
De folgjende lokaasjes dogge mei oan it projekt: De Afûk, dbieb Blokhuisplein, Fries Museum, Fries Verzetsmuseum, Keramiekmuseum Princessehof, Meeuw Jonge Theatermakers, Natuurmuseum Fryslân, Neushoorn, Stadsschouwburg de Harmonie, Slieker Film, Tresoar en Tryater.
Mear ynformaasje fynst hjir.
