Pak hjir jo winkelwein: Frysk yn ‘e supermerk
Praat mar Frysk/Afûk wurdt by dizze aksje ynspirearre troch de Dútske supermerk EDEKA. Dy foarsjocht hieltyd mear winkels yn Ostfriesland fan twatalige opskriften yn it ‘Ostfreesk,’ njonken it Dútsk. EDEKA sette hjir in pear jier lyn mei útein yn it plak Grossefehn by Aurich.
Sukses
Dy earste ‘Ostfreeske supermerk’ waard sa’n sukses, dat ferline wike tongersdei al de tsiende winkel yn de nije twatalige formule iepen gie yn it plakje Pewsum. “De toeristen fine it hast noch moaier as de minsken út de streek”, fertelt Arno Ulrichs fan de Fryske Rie yn East-Fryslân. De EDEKA kriget by dizze aksje taalkundige stipe fan de Ostfriesische Landschaft in Aurich.
It giet by EDEKA net allinnich om de opskriften. De klanten wurde wolkom hjitten mei de Eastfryske groet ‘Moin’ en kinne ek alle bestellingen yn de streektaal dwaan. Meiwurkers dy’t de taal noch net kinne, meie yn wurktiid op Eastfryske les. Yn de winkel wurde alle produktgroepen úttsjutte yn it Eastfrysk en dat liket sa út en troch dochs wol aardich op ús Frysk. Sa hjitte ‘Waschmittel’ yn it Eastfrysk ‘Waskmiddels’ en hinget boppe it maandverband in buordsje mei de tekst ‘Froolüüsaken’.
Ek oare praktyske meidielingen binne yn it foarste plak yn it Eastfrysk, lykas ‘Disse Kass is för en körten Tied dicht’. By de formule heart ek ekstra omtinken foar produkten út de eigen streek.
‘Haadkantoaren bûten Fryslân bepale’
Praat mar Frysk/Afûk is fan doel om noch dit kalinderjier ien of mear Fryske supermerken te foarsjen fan Fryske opskriften. “It brûken fan de eigen taal kin in supermerk folle oantrekliker meitsje foar de klanten. It soarget foar mear bining foar de minsken út eigen doarp en streek, mar it makket de winkel ek nijsgjirriger foar toeristen.” Dat it Frysk oant ta ta mar in bytsje yn supermerken brûkt wurdt komt neffens Jagersma benammen omdat it faak haadkantoaren bûten Fryslân binne dy’t útmeitsje hoe’t de winkels der út sjogge en alle beboerding oanleverje.
“Wy moatte hjir yn Fryslân sjen litte hoe’t je ek mei taal en meartaligens omgean kinne”, seit Jagersma. Mear Frysk yn it strjitbyld én mear Frysk by it bedriuwslibben binne spearpunten foar de taalbefoarderingsorganisaasje. Supermerken dy’t hjiroan meidwaan wolle kinne har by Praat mar Frysk/Afûk melde: f.jagersma@afuk.nl.
Boppe de servicebaly stiet: Hawwe je noch fragen? – Foto: Omrop Fryslân, Onno Falkena
