It tema fan 2024 is ‘eigenwiis’ en slut dêrby oan op it tema fan de lanlike ‘kinderboekenweek’. Foar de pjutten ferskynt yn dit tema in nij Tomke-boekje, dêr’t by gastâlden en op de pjutte- en berne-opfang út foarlêzen wurdt. Nei ôfrin krije de pjutten it boekje mei nei hûs, sadat bern en âlders thús ek genietsje kinne fan de ferhalen.
Foar de âldere bern (4 o/m 8 jier) ferskynt in nij Keimpe-boekje yn itselde tema, dat elkenien yn de biblioteek ophelje kin. Alle basisskoallen krije ek in eksimplaar fan it boekje tastjoerd om mei de Lês-mar-foar-wiken út foar te lêzen.
Thús
Op tsjil.omropfryslan.nl binne yn septimber nije bernefilmkes te besjen. En op Tjitsfloch binne alle ferhaaltsjes en ferskes út de Tomke-boekjes te hearren! Dêrneist wurde der mei de Lês-mar-foar-wiken ferskate foarlês-, teäter-, dûns-, en sjongaktiviteiten organisearre yn de biblioteken fan Fryslân. Foar de bern fan 2 o/m 8 jier âld leit dêr in fergees Tomke- of Keimpe-boekje klear. Dus: Lês mar foar!
It Lês-mar-foar-projekt wurdt organisearre troch Afûk, Fers, SFBO, Cedin en Omrop Fryslân. Mear ynformaasje oer de lês-mar-foar-wiken is te finen op lesmarfoar.frl.
