De Fryske taal ferstean, praten en skriuwen leare: de Afûk helpt dy dêr graach by! Wy biede in grut ferskaat oan kursussen oan. Boppedat ûntwikkelje wy foar it Frysk yn it ûnderwiis in protte lesmateriaal. Fan pjut oant grut, elkenien leart it Frysk mei de Afûk!
Yn Fryslân binne ferskate útjouwers dy’t harren talein hawwe op it útjaan fan Fryske fiksje en non-fiksje. Printeboeken, romans en dichtbondels mar ek boeken oer Fryslân, skiednis en taal, en tydskriften. Yn sawat alle boekwinkels yn Fryslân fynst ek Frysktalige boeken.
De Afûk is útjouwer fan it twatalige tydskrift heit&mem. Dêrnjonken ferskine noch in tal nijsgjirrige tydskriften op de Fryske merk.
De Afûk hat in spesjalisearre boek- en kadowinkel oan de Bûterhoeke yn Ljouwert, mar docht ek boekferkeap op lokaasje mei saneamde diskes (kramen). In diske mei in moai assortimint Fryske (berne)boeken en boeken oer Fryslân is poer geskikt op merken, fairs en beurzen.
Foarlêzen, dêr begjint it mei. Tegearre in boekje lêze, plaatsjes oanwize en ferhaaltsjes fertelle fersterket de bân mei dyn bern. En bern dêr’t as lytse poppe al oan foarlêzen wurdt, binne letter better yn taal. Kinst net op ‘e tiid genôch begjinne mei foarlêzen. Mear witte? Gean dan nei heit&mem.
De Sutelaksje bringt it Fryske boek by dy oan de doar. En ast sa’n aksje mei bygelyks dyn (sport)feriening of muzykkorps organisearrest, kinne jim ek nochris 25% fan de omset yn de klupkas stoarte.