Aginda oersjoch

Bestiet de wiere Fries? Hoe foarmet de generaasje fan no ús takomstich heitelân? Dy en oare fragen ûndersiket Johanneke Dijkstra yn KRIICH, in hybride film dy’t dokumintêre en fiksje byinoar bringt en de Fries fan no toant yn al syn fasetten. Dêrmei is it ek in útnûging om mei-inoar stil te stean by wa’t wy binne, wat wy leare fan ús ferline en hoe’t wy it takomstich heitelân foarmje. De toer foarmet de start fan Johanneke har artistike promoasjeûndersyk oan de Ryksuniversiteit Grins en tsjinnet dêrby as petearstarter: nei it sjen fan de film wurdt it publyk útnûge om útienrinnende perspektiven te dielen. De film makket in doarpetoer lâns Nes, Ljouwert, De Trieme, Marrum en Drachten en sil letter ek ymplemintearre wurde yn lessen foar it fû en it mbû. Mear ynfo en tickets: Kriich – Arcadia.

Jûn is de Berneboeke-ambassadeur (BBA) by de ledegearkomste fan it Skriuwersbûn yn Tresoar om te fertellen oer lêsbefoardering by bern. Reina Greet Smeink-Kroodsma sil fertelle oer de ferhalen dy’t sy skriuwt foar Keimpe de Krokodil. En Martine Jansen sil fertelle oer it projekt Read With MEE. De BBA hat meiwurke oan in ferhaal en oersetting foar dat projekt. It Skriuwersbûn is in feriening fan Fryske skriuwers, dichters, oersetters, publisisten en minsken dy’t de Fryske skriuwerij tagedien binne. It Bûn leveret in bydrage oan it ferbetterjen fan it literêre klimaat en behertiget de belangen fan auteurs yn it Frysk troch kontakten te ûnderhâlden mei in ferskaat oan organisaasjes, sa as Tresoar, Boeken fan Fryslân, Fryske Akademy, útjouwers, de Rie fan de Fryske Beweging en de Provinsje Fryslân. Twa kear jiers wurdt der in ledegearkomste organisearre.

Elkenien hat wol in ferhaal. Op Ferhalejûn moetet hiel Fryslân inoar om te harkjen nei ferhalen. Ferhalen yn húskeamers, musea, kafees, oerheidsgebouwen, biblioteken, by ferienings en bedriuwen. It tema fan dit jier is: ‘Doe’t ik moed hie’. Tink bygelyks oan de moed dy’tst fieldest doest wat diest watst net earder doarst, of it momint datst in oar holpst, sels as dat net maklik wie. Moed hat in protte foarmen, mar ien ding is wis: elk ferhaal oer moed kin in oar ynspirearje. Sjoch op verhalenavond.nl foar alle ynformaasje!

Dit jier fiert it wrâldferneamde printeboek Kening & Kening in jubileum, it bestiet 25 jier! Om dêr by stil te stean jouwe beide makkers, Linda de Haan en Stern Nijland, in masterclass én in workshop. Yn de masterclass nimme de auteurs dy mei yn de skiednis fan Kening & Kening. Dit earste LHBTIQ+ boek foar jonge bern is yn hiel wat talen oerset, tsjinne as ynspiraasje foar ferskillende produksjes, fan iepenloft oant ballet en brocht de makkers in soad moetingen. Dêr fertelle se oer en ek fertelle se hoe’t se it printeboek makke hawwe. Nei de masterclass folget in workshop en kinst sels oan de slach. Tusken de bedriuwen troch is der boeke-ynspiraasje en ferkeap troch de Afûk. Mear ynformaasje en oanmelden fia tresoar.frl. Fol=fol!

‘Stap op de Rode Loper‘ is in lanlik programma foar fmbû- en mbû-learlingen om taalfeardigens te stimulearjen en harren kulturele hoarizon te ferbreedzjen. Yn Ljouwert komme learlingen út hiel Fryslân hjoed nei it teäter, museum of oare kulturele ynstelling. Dêr kinne se lústerje nei ien dy’t yn de keunsten wurket mei wurden. In rapper, yllustrator, dichter, byldzjend keunstner, of in skriuwer, lykas de Berneboeke-ambassadeur. Fansels sille de learlingen sels ek oan de slach!

By it ferskinen fan ’e bondel Us eigenste Taal op 29 novimber 2025 wurdt in Taalfoarum organisearre. Yn Frentsjer iepenet de Kommissaris fan de Kening Arno Brok dizze dei en kriget hy it earste eksimplaar fan de sammeldichtbondel yn hannen. Yn de De Groate Kerk fan St.-Jabik is de lieding dizze dei is yn hannen fan Margriet Brandsma. Fierder oanwêzich: Syds Wiersma, Tsead Bruinja, Mirka Antolovic, Doutsen van Gosliga, Anne-Goaitske Berteler en de Berneboeke-ambassadeur. Mear ynformaasje: fryskenfrij.nl.

Spannend! Hjoed wurdt yn in soad húshâldings it Sinteklaasfeest fierd. Sikest (noch) in orizjineel Frysk kadootsje? Kom even lâns yn ús Fryske boek- en taalwinkel oan de Boterhoek 3 yn Ljouwert. Wy hawwe it grutste assortimint Fryske boeken, boeken oer it Frysk en Fryslân, yn alle soarten, maten en ynteressegebieten en foar jong oant âld. Gjin boek? Jawis, dat kin ek: sneup dan troch ús oanbod Fryske kado-artikels. Fansels pakke wy dyn Sinteklaaskadootsje moai foar dy yn. Gesellige jûn!

Bûten is it donker en kâld mar binnen is it waarm en smûk. Us advys: begraaf dy lekker mei in steapel boeken op de bank. Yn ús boek- en kadowinkel oan de Boterhoek 3 yn Ljouwert en/of yn ús websjop fynst in hieieiel soad boeken dy’t it lêzen mear dan wurdich binne! Enne, in moai boek is fansels ek super leuk om kado te dwaan #dochinboekkado. Fansels pakke we dyn kado of kadootsjes moai yn. PS op tongersdei 25 en freed 26 desimber is ús winkel ticht. Bestellings yn de websjop wurde op moandei ôfhannele. Wy winskje elkenien noflike Krystdagen!

Yn de wike fan 29 desimber oant en mei 2 jannewaris binne wy beheind iepen en berikber. Alline tiisdei 30 desimber is ús winkel iepen en ferwolkomje wy jo graach fan 10.00 oere ôf, mar slute wy earder as oars, om 14.00 oere de doarren. Fan moandei 5 jannewaris ôf jilde wer de brûklike iepeningstiden foar de winkel en kantoar. Foar wa’t dochs even winkelje wol: yn ús websjop kinst fansels 24/7 telâne! Foar 2026 winskje wy elkenien folle lok en seine!

Mei de ‘Nationale Voorleesdagen’ is der ekstra omtinken foar it foarlêzen oan bern fan 0-6 jier. It ‘printeboek fan it jier’ dat mei de Nasjonale Foarlêsdagen sintraal stiet is Kleine Aap fan Mies van Hout en is ek yn in Fryske oersetting ferskynd! Troch de Afûk wurdt dêr in lesbrief by beskikber makke mei tips en suggestjes foar aktiviteiten om it printeboek hinne. Fierder meitsje wy dizze wike hiel leuk nijs bekend…. De Nasjonale Foarlêsdagen ha as doel om it foarlêzen oan bern, dy’t sels noch net lêze kinne, te befoarderjen. Foarlêzen stimulearret de (taal-)ûntwikkeling fan bern en it prikelet de fantasij. En it is ek nochris hiel gesellich!

… hjir hast myn hannen leaf, myn lea, dyn libbenlang myn stoutste dreamen …

Hjoed is it Falentynsdei! De dei om de leafde fan dyn libben te besjongen, of miskien wol ta te sjongen of …. wat dan ek, mar dyn leafste witte litte watsto fan him/har(ren) fynst, dochst fansels yn de taal fan dyn hert. Foar de leafste Fryske Falentynskado’s komst del yn ús winkel oan de Boterhoek yn Ljouwert of sjopst se yn ús websjop.

Hjoed foar it lêst te sjen: it wûndere wurk fan berneboekeskriuwer en -yllustrator Stern Nijland en keunstner O.C. Hooymeijer yn de eksposysje ‘Fauna XXtraordinaire – Dierlijk beeld met een literaire klank’ yn De Utrecht yn Ljouwert. Dy eksposysje is in inisjatyf fan Berneboeke-ambassadeur Tialda Hoogeveen, dy’t ek de literêre programmearring fersoarge hat. By de finissage hjoed, is wurk te hearren fan learlingen fan de Skriuwersfakskoalle en de Schrijversvakschool Groningen dy’t har ynspirearre litten hawwe troch de âldste Nederlânske tekst ‘Hebban olla uogala nestas hagunnan hinase hic anda thu uuat unbidan uue nu’. Wês wolkom! Mear ynformaasje is te finen op deutrecht.frl.